Bu günlərdə Təhsil Nazirliyi məktəblərdə hər hansı bəhanə ilə pul yiğılmasının yolverilməz olduğunu açıqladı. Sözügedən nazirlik hansısa məktəbdə bu kimi hallara rast gəlindikdə ciddi addım atılacağını, uşaqlardan, valideynlərdən pul yığan müəllim və direktorların işdən azad ediləcəyini bildirdi.
Bütün bunlara baxmayaraq, bizə daxil olan məlumatlara görə "Beynəlxalq Müəllimlər Günü”ndə Sumqayıtda fəaliyyət göstərən bəzi orta məktəblərdə yenə də "pulyığma kampaniyası” "uğurla” həyata keçirilib. Görünür, tabe olduqları nazirliyin xəbərdarlığı hələ də onlara aldıqları "şirinlik” və hədiyyə kimi "dadlı” xüsusiyyətləri unutdura bilmir. Deməli, daha ciddi addımlar atılmalı, müəllim-valideyn münasibətlərinə "şirinlik” və "hədiyyə” kimi neqativ hallar körpü salmamalıdır. Ən acınacaqlısı da odur ki, yığılan pullardan birbaşa direktorlar xəbərdardır və onların xüsusi "payı” var.
Yuxarıda bəhs etdiyimiz mövzu ilə bağlı əməkdaşımız Sumqayıtda nümunəvi təhsil ocağı kimi tanınan Yusif Məmmədəliyev adına 31 nömrəli tam orta məktəbin direktoru Xanım Əhmədovaya müraciət edib. X.Əhmədova bildirib ki, istər məlum xəbərdarlıqdan əvvəl, istərsə də sonra rəhbərlik etdiyi məktəbdə pul yığılması qəti qadağan edilib:
"Müəllim peşəsinə və şərəfinə xələl gətirən bu kimi hallar əlbəttə, yolverilməzdir. Mən məktəbimizin müəllimlərinə dəfələrlə tapşırmışam, valideynlərdən xahiş etmişəm ki, bu işdə hamımız birgə mübarizə aparaq, ən xırda nöqsanlara belə yol verməyək”.
Direktor Təhsil Nazirliyinin məlum xəbərdarlığını olduqca vacib və təqdirə layiq hal kimi dəyərləndirdi:
"Kimliyindən asılı olmayaraq, şərəfli müəllim adına ləkə gətirən, xoşagəlmaz hallara yol verən hər kəs işindən azad edilməli, əlbəttə, layiqli cəzasını almalıdır”.
Qeyd edək ki, 2013-cü ildə "İlin ən yaxşı məktəbi” müsabiqəsinin qalibi olan 31 nömrəli tam orta məktəb 2009-2010-cu ildə "Elektron məktəb-Pilot layihəsi”nə qoşulub. Həmçinin 2008-2012-ci illər üçün təhsil sisteminin informasiyalaşdırılması üzrə dövlət proqramına əsasən məktəbə yüksək internet xətti çəkilib.
İnanırıq ki, bundan sonra da müəllim adına utanc gətirən hallarla qarşılaşmayacağıq. Balalarımızın təlim-tərbiyəsi ilə məşğul olan, onlara Ana və Vətən kimi ülvi kəlmələri yazdıran müəllimlərimizin xoş sədası, əldə etdikləri nailiyyətləri və qazandıqları uğurları bizi həmişə sevindirəcək, qürurlandıracaq. Axı müəllimlik müqəddəs peşədir.
P.S - belə bir hallarla rastlaşarsınızsa, çəkinmədən Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin 161 nomreli qaynar xəttinə zəng edib şikayətinizi bildirəsiniz.
